പാലക്കാട്: കാറിന്റെ ഡോർ തട്ടി ബൈക്ക് മറിഞ്ഞുണ്ടായ അപകടത്തിൽ പെൺകുട്ടി മരിച്ചു. തേങ്കുറുശ്ശി തുപ്പാരക്കളം എ. സതീഷിന്‍റെ മകൾ അജ്മയയാണ് (6) മരിച്ചത്. വെള്ളിയാഴ്ച രാത്രി എട്ടോടെ നഗരത്തിലെ പാലാട്ട് ജങ്ഷനിലായിരുന്നു അപകടം. നിർത്തിയിട്ട കാറിന്റെ ഡോർ പെട്ടെന്ന് തുറന്നതിനാൽ കുടുംബം സഞ്ചരിച്ച ബൈക്കിൽ തട്ടുകയായിരുന്നു.നിയന്ത്രണംവിട്ട് മറിഞ്ഞ ബൈക്കിൽനിന്ന് തെറിച്ചുവീണ അജ്മയ തൽക്ഷണം മരിച്ചു. ബൈക്കോടിച്ച സതീഷ് ജില്ല ആശുപത്രിയിൽ ചികിത്സയിലാണ്. ഭാര്യ നിമിഷക്കും അജ്മയുടെ സഹോദരി അൻസികക്കും നിസ്സാര പരിക്കേറ്റു. ഇവർ ക്ഷേത്രത്തിലും വാടികയിലും പോയി തിരികെ വീട്ടിലേക്ക് പോകുമ്പോഴായിരുന്നു അപകടം.
