തച്ചനാട്ടുകര: പാലക്കാട്-കോഴിക്കോട് ദേശീയപാതയിലെ കൊടക്കാട് ലോറിയും കാറും കൂട്ടിയിടിച്ച് കാർ ഡ്രൈവർ മരിച്ചു. എൻ.ജി.ഒ യൂനിയൻ ജില്ല സെക്രട്ടേറിയറ്റ് അംഗവും സംസ്ഥാന കൗൺസിൽ അംഗവുമായ തച്ചമ്പാറ വേർകാട്ടിൽ പ്രദീപ് കുമാറാണ് (55) മരിച്ചത്. ഞായറാഴ്ച രാവിലെ 9.30നായിരുന്നു അപകടം. പാലക്കാട്ടുനിന്ന് കോഴിക്കോട് ഭാഗത്തേക്ക് പോവുകയായിരുന്ന ലോറിയും എതിരെ വന്ന കാറും കൂട്ടിയിടിക്കുകയായിരുന്നു. ഭാര്യയെ മഞ്ചേരിയിലെ ജോലിസ്ഥലത്ത് കൊണ്ടുവിട്ട് തിരിച്ചുവരവെ ആയിരുന്നു അപകടം. അട്ടപ്പാടി ജലസേചന വകുപ്പിൽ ജീവനക്കാരനാണ് പ്രദീപ്. ഭാര്യ: ലത. മകൾ: ദയ.
