കോട്ടയം: എം.സി റോഡിൽ ചിങ്ങവനം ഗോമതിക്കവലയിൽ നിയന്ത്രണം വിട്ട കാർ മത്സ്യക്കടയിലേക്ക് ഇടിച്ചുകയറി അന്തർസംസ്ഥാന തൊഴിലാളി മരിച്ചു. കടയിലെ ജീവനക്കാരനായ അസം സ്വദേശി ഹേമന്ദ് ഛേത്രിയാണ് (40) മരിച്ചത്. വ്യാഴാഴ്ച രാവിലെ എട്ടോടെയാണ് അപകടം. ചങ്ങനാശ്ശേരി ഭാഗത്തുനിന്ന് അമിതവേഗത്തിലാണ് കാർ എത്തിയതെന്ന് ദൃക്സാക്ഷികൾ പറയുന്നു. ഹേമന്ദ് ഛേത്രി കാറിനും കടക്കും ഇടയിൽ കുടുങ്ങി. നാട്ടുകാരും പൊലീസും ചേർന്ന് നടത്തിയ രക്ഷാപ്രവർത്തനത്തിന് ഒടുവിൽ പുറത്തെടുത്ത് ആശുപത്രിയിൽ എത്തിച്ചെങ്കിലും രക്ഷിക്കാനായില്ല. മീൻകടയും സമീപത്ത് പാർക്ക് ചെയ്തിരുന്ന ഗുഡ്സ് ഓട്ടോറിക്ഷയും കാർ ഇടിച്ചുതകർത്തു. പരിക്കേറ്റ കാർ ഡ്രൈവറെ ജില്ല ജനറൽ ആശുപത്രിയിൽ പ്രവേശിപ്പിച്ചു. അപകടത്തെതുടർന്ന് എം.സി റോഡിൽ അരമണിക്കൂറോളം ഗതാഗതവും തടസ്സപ്പെട്ടു. ചിങ്ങവനം പൊലീസ് കേസെടുത്തു.
