തുറവൂർ: സൈക്കിളിൽ പോകുന്നതിനിടെ തുറവൂർ പൂമംഗലത്ത് വീട്ടിൽ പി.സുരേഷ് (കുട്ടൻ - 50) അജ്ഞാത വാഹനം ഇടിച്ച് മരിച്ചു. ദേശീയ പാതയിൽ തുറവൂർ പുത്തൻ ചന്ത പമ്പിന് സമീപം ശനിയാഴ്ച രാത്രി എട്ടരയോടെയായിരുന്നു അപകടം. ഗുരുതര പരിക്കേറ്റ് റോഡരികിലെ പുല്ലിന് മുകളിൽ രക്തം വാർന്ന് ഏറെ നേരം കിടന്ന സുരേഷിനെ കുത്തിയതോട് പൊലീസെത്തി ജീപ്പിൽ തുറവൂർ താലൂക്ക് ആശുപത്രിയിൽ എത്തിച്ചെങ്കിലും രക്ഷിക്കാനായില്ല. ഇടിച്ചതെന്ന് സംശയിക്കുന്ന തടി കയറ്റി പോയ ലോറി പൊലീസ് കസ്റ്റഡിയിലെടുത്തു. നടപടികൾക്ക് ശേഷം മൃതദേഹം ബന്ധുക്കൾക്ക് വിട്ടുകൊടുത്തു. സംസ്കാരം വീട്ടുവളപ്പിൽ നടത്തി. ഭാര്യ: മായ. മക്കൾ: ദേവീകൃഷ്ണ, കൃഷ്ണപ്രിയ.
