എരുമപ്പെട്ടി: പൂരം കാണാനെത്തിയ യുവാവ് കിണറ്റിൽ വീണ് മരിച്ചു. എയ്യാൽ ചിറ്റലങ്ങാട് പണ്ടിരിഞ്ഞാൽ വീട്ടിൽ വിനയന്‍റെ മകൻ കമൽ (21) ആണ് മരിച്ചത്. തിങ്കളാഴ്ച വൈകീട്ട് എയ്യാൽ പൂരത്തിന്‍റെ കൂട്ടി എഴുന്നള്ളിപ്പിന് ശേഷമാണ് സംഭവം. പൂരത്തിന് എത്തിയ കമൽ ക്ഷേത്രത്തിന് പിറകുവശത്തെ ആളൊഴിഞ്ഞ പറമ്പിലേക്ക് മൂത്രമൊഴിക്കാൻ പോയതാണെന്ന് പറയുന്നു. കമലിനെ കാണാതായതോടെ കൂട്ടുകാര്‍ നടത്തിയ അന്വേഷണത്തിലാണ് കിണറ്റില്‍ കണ്ടത്. നാട്ടുകാരും സ്ഥലത്തുണ്ടായിരുന്ന എലിഫന്‍റ് സ്‌ക്വാഡും കുന്നംകുളത്തുനിന്ന് എത്തിയ അഗ്നി രക്ഷാ സേനയും ചേര്‍ന്നാണ് പുറത്തെടുത്തത്. ഉടനെ ആശുപത്രിയിൽ എത്തിച്ചെങ്കിലും മരിച്ചു. മൃതദേഹം കുന്നംകുളം റോയൽ ആശുപത്രി മോർച്ചറിയിൽ. എരുമപ്പെട്ടി പൊലീസ് മേൽനടപടി സ്വീകരിച്ചു. മാതാവ്: വിനീത. സഹോദരൻ: വിമൽ.
