നെടുമ്പാശ്ശേരി: കൊച്ചി വിമാനത്താവളത്തിലേക്കുവന്ന കാർ നിയന്ത്രണംവിട്ട് മറിഞ്ഞ് യുവാവ് മരിച്ചു. ബന്ധുക്കളായ മൂന്നുപേർക്ക് പരിക്ക്. കോട്ടയം ചങ്ങനാശ്ശേരി കരിങ്ങട വീട്ടിൽ അലൻ അന്റണി (28) ആണ് മരിച്ചത്.
കാറിൽ ഒപ്പമുണ്ടായിരുന്ന ചങ്ങനാശ്ശേരി കരിങ്ങട വീട്ടിൽ ജഫ്രി തോമസ് (23), ആന്റണി തോമസ് (34), ചങ്ങനാശ്ശേരി ചെട്ടിക്കാട്ട് വീട്ടിൽ ഷെജി വർഗീസ്(27) എന്നിവർക്കാണ് പരിക്കേറ്റത്. ചൊവ്വാഴ്ച വൈകീട്ട് 5.30ഓടെ കൊച്ചി അന്താരാഷ്ട്ര വിമാനത്താവളത്തിന് മുന്നിലാണ് അപകടം. കാർ നിയന്ത്രണംവിട്ട് ബാരിക്കേഡിൽ ഇടിച്ച് തലകീഴായി മറിയുകയായിരുന്നു. അലൻ കാറിൽനിന്ന് തെറിച്ചുപോയി. നാലുപേരെയും ഉടൻ അങ്കമാലി ലിറ്റിൽ ഫ്ലവർ ആശുപത്രിയിലെത്തിച്ചെങ്കിലും അലൻ മരിച്ചു. മറ്റു മൂന്നുപേരുടെ നില ഗുരുതരമല്ല. ജഫ്രിയെ വിദേശത്തേക്ക് യാത്രയാക്കാൻ കാറിലെത്തിയതാണ് അലനും സംഘവും. അലന്‍റെ പിതാവ്: പരേതനായ ഷാജി, മാതാവ് ബിൻസി , സഹോദരൻ അനൽ.
