ചെറായി: ഓട്ടോ ഡ്രൈവർ പാലത്തിന്‍റെ മുകളിൽ ഓട്ടോ നിർത്തി കായലിലേക്ക് ചാടി. ഓട്ടോറിക്ഷയിലുണ്ടായിരുന്ന ഭാര്യയുടെയും മക്കളുടെയും കരച്ചിൽകേട്ട് അതുവഴി വന്ന യുവാവ് പിന്നാലെ ചാടി രക്ഷാപ്രവർത്തനം നടത്തി ആശുപത്രിയിലെത്തിച്ചെങ്കിലും മരിച്ചു. പള്ളിപ്പുറം ഓളാട്ട്പുറത്ത് ആന്‍റണിയാണ് (ആന്‍റീശോ -46) പള്ളിയിൽനിന്ന് തിരിച്ചു വരുംവഴി കായലിൽ ചാടി മരിച്ചത്.ശനിയാഴ്ച ഉച്ചക്ക് രണ്ടരയോടെ പള്ളിപ്പുറം - മാല്യങ്കരപ്പാലത്തിലാണ് സംഭവം. ചെറായി ചക്കി വീട്ടിൽ രമേഷിന്‍റെ മകൻ വിഷ്ണുവാണ് ജീവൻ പണയപ്പെടുത്തി രക്ഷിക്കാൻ ശ്രമിച്ചത്. വലതുകൈ ഒടിഞ്ഞ് പരിക്കേറ്റ യുവാവ് കുടുംബാംഗങ്ങളുടെ കരച്ചിൽ കേട്ടാണ് കുത്തൊഴുക്കുള്ള പള്ളിപ്പുറം കായലിലേക്ക് എടുത്തുചാടിയത്. മുനമ്പം പൊലീസ് നേതൃത്വത്തിൽ മൃതദേഹം പോസ്റ്റ്മോർട്ടത്തിനായി പറവൂർ താലൂക്ക് ആശുപത്രിയിലേക്ക് മാറ്റി. ഭാര്യ: നിഷി. മക്കൾ: ആൽഫിൻ, ആൽഫിയ.
