മാന്നാർ: തെരുവുനായ് കുറുകെ ചാടി ബൈക്ക് മറിഞ്ഞ് പരിക്കേറ്റ് ചികിത്സയിലിരുന്ന മാന്നാർ കുരട്ടിശ്ശേരി മേൽപാടം പെരുംകണ്ണാരിൽ വീട്ടിൽ രാജശേഖരൻ (55) മരിച്ചു.
കഴിഞ്ഞ 21ന് മകൻ രാജേഷിനെ ഖത്തറിലേക്ക് യാത്രയയക്കാൻ വിമാനത്താവളത്തിൽ പോയി തിരികെവന്ന ശേഷം രാജശേഖരൻ മാന്നാറിൽനിന്ന് ബൈക്കിന് പിന്നിലിരുന്ന് വീട്ടിലേക്ക് പോകവേ വൈകീട്ട് ഏഴിനാണ് അപകടം. മാന്നാർ - വീയപുരം റോഡിൽ പാവുക്കര കടപ്ര മഠം ജങ്ഷന്‌ പടിഞ്ഞാറുവശം തെരുവുനായ് ചാടിയതോടെ ബൈക്ക് നിയന്ത്രണം വിട്ട് മറിഞ്ഞു. തലക്ക് ഗുരുതര പരിക്കേറ്റ് പരുമലയിലെ സ്വകാര്യ ആശുപത്രിയിലും പിന്നീട് കോട്ടയം മെഡിക്കൽ കോളജ് ആശുപത്രിയിലും ചികിത്സയിലായിരുന്നു. നില ഗുരുതരമായതിനെത്തുടർന്ന് കോട്ടയത്തെ സ്വകാര്യ ആശുപത്രിയിൽ പ്രവേശിപ്പിച്ചു. ഇതിനിടെ, തിങ്കളാഴ്ച ഉച്ചക്ക് ഒരു മണിയോടെ മരണം സംഭവിച്ചു. സംസ്കാരം ചൊവ്വാഴ്ച വൈകീട്ട് നാലിന് വീട്ടുവളപ്പിൽ. ഭാര്യ: പരേതയായ നിർമല. മറ്റൊരു മകൻ: പ്രവീൺ (ഖത്തർ).
