ഗാന്ധിനഗർ: കോവിഡ് ബാധിച്ച് ചികിത്സയിലിരുന്ന വിദേശപൗരൻ മരിച്ചു. ഫ്രാൻസ് സ്വദേശിയായ പെയ്റി ഹെൻട്രി (മെർസയൻ പൈവേ) എന്നയാളാണ് മരിച്ചത്. കോട്ടയം മെഡിക്കൽ കോളജിൽ ചികിത്സയിലിരിക്കെ തിങ്കളാഴ്ച പുലർച്ചയാണ് അന്ത്യം. കോവിഡ് ബാധിതനായി എറണാകുളം ജനറൽ ആശുപത്രിയിലും കളമശ്ശേരി മെഡിക്കൽ കോളജിലും ചികിത്സയിൽ കഴിഞ്ഞിരുന്നു. ആരോഗ്യനില ഗുരുതരമായതിനെ തുടർന്ന് ശനിയാഴ്ചയാണ് കോട്ടയം മെഡിക്കൽ കോളജിൽ പ്രവേശിപ്പിച്ചത്. മൃതദേഹം മെഡിക്കൽ കോളജ് ആശുപത്രി മോർച്ചറിയിൽ. വിദേശപൗരൻ നിര്യാതനായത് സംബന്ധിച്ച് ജില്ല പൊലീസ് അധികൃതരെ അറിയിച്ചിട്ടുണ്ടെന്നും എംബസിയുമായി ബന്ധപ്പെട്ട തുടർനടപടി അവർ സ്വീകരിക്കുമെന്നും മെഡിക്കൽ കോളജ് അധികൃതർ അറിയിച്ചു.