കോതമംഗലം: ഓട്ടോറിക്ഷയും കാറും കൂട്ടിയിടിച്ച് ഓട്ടോ ഉടമ ഇരമല്ലൂർ പൂവത്തൂർ വരിക്കാക്കുഴി വി.എൻ. ദിലീപ് കുമാർ (49) മരിച്ചു. ഞായറാഴ്ച രാത്രി 8.30ന് ഓടക്കാലി പാച്ചുപിള്ളപ്പടിയിലാണ് അപകടം. ഓട്ടോറിക്ഷയുമായി പെരുമ്പാവൂരിലേക്ക് പോയ ദിലീപ് റോഡിലെ കുഴി ഒഴിവാക്കാൻ ശ്രമിക്കവെ എതിർദിശയിലെത്തിയ കാർ ഓട്ടോയിൽ ഇടിക്കുകയായിരുന്നു. റോഡിലേക്ക് തെറിച്ചുവീണ് ഗുരുതര പരിക്കേറ്റ ദിലീപിനെ ആശുപത്രിയിലെത്തിക്കാൻ കാർ ഉടമ അതുവഴി വന്ന വാഹനങ്ങളുടെ സഹായം തേടിയെങ്കിലും ആരും തയാറായില്ല. 15 മിനിറ്റിലേറെ കഴിഞ്ഞെത്തിയ ഓട്ടോ ഡ്രൈവറുടെ സഹായത്തോടെ കോതമംഗലത്തെ സ്വകാര്യ ആശുപത്രിയിലെത്തിച്ചെങ്കിലും രക്ഷിക്കാനായില്ല. ഭാര്യ: സിജിമോൾ (സീനിയർ ക്ലർക്ക്, മുടക്കുഴ പഞ്ചായത്ത്). മക്കൾ: ദീപക്, നീരജ്.
