ആലുവ: ദേശീയപാതയിൽ ലോറിയുടെ പിന്നിൽ സ്ക്കൂട്ടറിടിച്ച് യുവാവ് മരിച്ചു. പൊന്നാനി മുക്കാടി കുഞ്ഞിമരക്കാരകത്ത് കുഞ്ഞൻബാവയുടെ മകൻ അബ്ദുൽ മനാഫാണ് (33) മരിച്ചത്. പറവൂർ കവല സിഗ്നലിൽ ചൊവ്വാഴ്ച പുലർച്ച 5.45 ഓടെയാണ് അപകടം. സിഗ്നലിൽ നിർത്തിയിട്ടിരുന്ന ലോറിക്ക് പിറകിൽ സ്‌കൂട്ടർ ഇടിച്ചുകയറുകയായിരുന്നു. നാട്ടുകാർ ലോറിയുടെ പിറകുവശം ഉയർത്തിയാണ് മനാഫിനെ പുറത്തെടുത്തത്. ആലുവ നജാത്ത് ആശുപത്രിയിലും കളമശ്ശേരി മെഡിക്കൽ കോളജ് ആശുപത്രിയിലും ആസ്റ്റർ മെഡ്സിറ്റിയിലും എത്തിച്ചെങ്കിലും മരിച്ചു. പൊന്നാനിയിൽ ബജാജ് ഫിനാൻസ് കലക്ഷൻ ഫീൽഡ് സ്റ്റാഫായിരുന്നു. ഇടപ്പള്ളിയിൽ നടക്കുന്ന ബജാജ് ഫിനാൻസ് ജീവനക്കാരുടെ യോഗത്തിൽ പങ്കെടുക്കാൻ പോകുന്നതിനിടെയാണ് അപകടം. ഭാര്യ: സബൂറ.
