മാവേലിക്കര: കനാലില്‍ യുവാവിനെ മരിച്ചനിലയിൽ കണ്ടെത്തി. പുന്നമൂട് പുതുമംഗലത്ത് രാജന്‍ കുട്ടനാണ് (38) മരിച്ചത്.
ചെട്ടികുളങ്ങര ഈരേഴ വടക്ക് കമ്പനിപ്പടിക്ക് സമീപം ചൊവ്വാഴ്ച പുലര്‍ച്ചയാണ് സംഭവം. ഇയാള്‍ തിങ്കളാഴ്ച രാത്രി പ്രായിക്കരയില്‍ ചൂണ്ടയിടാന്‍ പോയതാണെന്ന് ബന്ധുക്കള്‍ പറഞ്ഞു. ചൂണ്ടയിട്ട് കിട്ടിയ മീനുമായി കമ്പനിപ്പടിക്ക് സമീപം ഇയാളും കുടുംബവും വാടകക്ക് താമസിക്കുന്ന വീട്ടിലേക്ക് പോകുംവഴിയാണ് അപകടം. വീട്ടിലേക്ക് പോകുന്നത് കനാലിന്‍റെ വശത്തുകൂടിയുള്ള ഇടുങ്ങിയ കോണ്‍ക്രീറ്റ് റോഡിലൂടെയാണ്. ഇതുവഴി ബൈക്കില്‍ പോകുമ്പോള്‍ ബൈക്ക് തെന്നി കനാലിലേക്ക് മറിയുകയായിരുന്നുവെന്ന് കരുതുന്നു. രാവിലെ കനാലില്‍ കമിഴ്ന്നുകിടക്കുന്ന നിലയിലാണ് മൃതദേഹം കണ്ടത്. മൃതദേഹം വണ്ടാനം മെഡിക്കല്‍ കോളജ് ആശുപത്രി മോര്‍ച്ചറിയില്‍.
ഭാര്യ: രേഷ്മ. മക്കള്‍: വേദിക, നിവേദിക.
