പൊൻകുന്നം: പാലാ- പൊൻകുന്നം റോഡിൽ രണ്ടാംമൈലിന് സമീപം അപകടത്തിൽപെട്ട സ്കൂട്ടറിലേക്ക് കെ.എസ്.ആർ.ടി.സി ബസ് ഇടിച്ചുകയറി ഹോട്ടൽ ജീവനക്കാരൻ മരിച്ചു. സ്കൂട്ടർ യാത്രക്കാരനായ പൊൻകുന്നം മെഡാസ് ഹോട്ടലിലെ ജീവനക്കാരൻ പനമറ്റം കാവിൽതാഴെയിൽ രാജേന്ദ്രൻപിള്ളയാണ് (56) ദാരുണമായി മരിച്ചത്. തിങ്കളാഴ്ച രാത്രി 11.45നായിരുന്നു അപകടം. റോഡിൽ മറിഞ്ഞുകിടന്ന സ്കൂട്ടറിലേക്ക് പെരിക്കല്ലൂരിൽനിന്ന് പൊൻകുന്നത്തേക്ക് വരുകയായിരുന്ന പൊൻകുന്നം ഡിപ്പോയുടെ ബസ് കയറുകയായിരുന്നു. പൊൻകുന്നം പൊലീസ് സ്ഥലത്തെത്തി യാത്രക്കാരുടെ സഹായത്തോടെ കാഞ്ഞിരപ്പള്ളി ജനറൽ ആശുപത്രിയിലെത്തിച്ചെങ്കിലും മരിച്ചു. രാത്രി ഹോട്ടലിലെ ജോലി കഴിഞ്ഞ് രാജേന്ദ്രൻ പിള്ള വീട്ടിലേക്ക് മടങ്ങവെയാണ് അപകടം. സ്കൂട്ടർ മറിഞ്ഞത് എങ്ങനെയെന്ന കാര്യത്തിൽ വ്യക്തയില്ല. മറ്റൊരു വാഹനം ഇടിച്ചതാണെന്നാണ് സംശയം. ഭാര്യ: സുമ. മക്കൾ: ജ്യോതിഷ്, സൂരജ്.