മരിച്ചവരിൽ ഏഴുവയസ്സുകാരിയും
അമ്പലപ്പുഴ: കാര്‍ നിയന്ത്രണംവിട്ട് ഇടിച്ചുകയറി ഏഴുവയസ്സുകാരി ഉള്‍പ്പെടെ ഒരു കുടുംബത്തിലെ രണ്ടുപേര്‍ മരിച്ചു. മറ്റ് നാലുപേര്‍ക്ക് പേര്‍ക്ക് പരിക്കേറ്റു. നൂറനാട് മാമൂട് പാലവിള കിഴക്കേതില്‍ സുനിലിന്‍റെ മകള്‍ നസ്രിയ (ഏഴ്), സുനിലിന്‍റെ സഹോദരി മിനി (40) എന്നിവരാണ് മരിച്ചത്. പിതാവ് അബ്ദുല്‍ അസീസ് (65), മാതാവ് നബീസ (64) മിനിയുടെ ഇരട്ടസഹോദരി മാമൂട് അന്‍ഷാദ് മന്‍സില്‍ സുനിത (40), ഭര്‍ത്താവ് ജലീല്‍ (45) എന്നിവര്‍ക്കാണ് പരിക്കേറ്റത്. വ്യാഴാഴ്ച വൈകീട്ട് 3.30ഓടെ പുറക്കാട്, പുന്തല ജങ്ഷന് സമീപമായിരുന്നു അപകടം. വിവാഹ ചടങ്ങില്‍ പങ്കെടുത്തതിന് ശേഷം കുടുംബസമേതം പുന്തലയില്‍ കടല്‍ക്കാഴ്ച കാണാനെത്തിയതായിരുന്നു. വീട്ടിലേക്ക് മടങ്ങാന്‍ ദേശീയപാതയോരത്ത് നില്‍ക്കുന്നതിനിടെ കാര്‍ നിയന്ത്രണംവിട്ട് ഇടിച്ചുകയറുകയായിരുന്നു. പരിക്കേറ്റവരെ നാട്ടുകാര്‍ ആംബുലന്‍സിലും അതുവഴിവന്ന വാട്ടര്‍ അതോറിറ്റി ഉദ്യോഗസ്ഥരുടെ വാഹനത്തിലുമാണ് ആലപ്പുഴ മെഡിക്കല്‍ കോളജ് ആശുപത്രിയില്‍ എത്തിച്ചത്. നസ്രിയയും മിനിയും ചികിത്സക്കിടെ മരിച്ചു. മിനിയുടെ ഭര്‍ത്താവ് താഹ.
