കല്ലടിക്കോട്: പാലക്കാട് - കോഴിക്കോട് ദേശീയപാതയിൽ കല്ലടിക്കോട് ടി.ബി സെന്‍ററിൽ ചരക്ക് ലോറിയും ബൈക്കും കൂട്ടിയിടിച്ച് സഹപ്രവർത്തകരായ രണ്ട് ബൈക്ക് യാത്രികർ മരിച്ചു. മണ്ണാർക്കാട് ശിവൻകുന്ന് ചുങ്കത്ത് ഡേവിസിന്‍റെ മകൻ ജോസ് (52), മണ്ണാർക്കാട് പയ്യനെടം കോഴിക്കാട്ടുതൊടി വീട്ടിൽ ഗോപാലകൃഷ്ണൻ നായരുടെ മകൻ രാജീവ് കുമാർ (51) എന്നിവരാണ് മരിച്ചത്. ഇരുവരും മലമ്പുഴ ഹോർട്ടി കൾച്ചർ െഡവലപ്മെന്‍റ് ഫാമിലെ ജീവനക്കാരാണ്. ജോലി സ്ഥലത്തേക്ക് പോകും വഴിയായിരുന്നു അപകടം. ബുധനാഴ്ച രാവിലെ 7.15നാണ് സംഭവം. പാലക്കാട് നിന്ന് പാചക വാതക സിലിണ്ടർ കയറ്റി മണ്ണാർക്കാട് ഭാഗത്തേക്ക് പോകുന്ന ലോറിയും എതിരെ വന്ന ബൈക്കുമാണ് കൂട്ടിയിടിച്ചത്. തുടർന്ന് നിയന്ത്രണംതെറ്റിയ ലോറി തൊട്ടടുത്ത പൊലീസ് സ്റ്റേഷന്‍റെ മുൻവശത്തെ ചുറ്റുമതിൽ ഇടിച്ച് തകർത്താണ് നിന്നത്. സാരമായി പരിക്കേറ്റ രാജീവ് സംഭവസ്ഥലത്തും ജോസ് തച്ചമ്പാറ സ്വകാര്യ ആശുപത്രിയിലേക്ക് കൊണ്ട് പോകുമ്പോഴുമാണ് മരിച്ചത്. മരിച്ച രാജീവ് കുമാറിന്‍റെ ഭാര്യ: സബിത. മക്കൾ: സജീവ്, സജിത. മരിച്ച ജോസിന്‍റെ ഭാര്യ: ജാൻസി. മക്കൾ: അബിൻ, ആൽവിൻ. മൃതദേഹങ്ങൾ പാലക്കാട് ജില്ല ആശുപത്രിയിൽ പോസ്റ്റ്മോർട്ടം നടത്തി ബന്ധുക്കൾക്ക് കൈമാറി.
