ആലുവ: ഗുഡ്സ് ഓട്ടോറിക്ഷയും സ്കൂട്ടറും കൂട്ടിയിടിച്ച് യുവാവ് മരിച്ചു. അശോകപുരം പള്ളിക്കുന്ന് റോസ് ഗാർഡൻ പോളപ്പറമ്പിൽ ജീവന്‍റെ മകൻ അലനാണ് (21) മരിച്ചത്. ബുധനാഴ്ച രാവിലെ 6.30ഓടെ ആലുവ എസ്.പി ഓഫിസിനും ജില്ല ആശുപത്രിക്കും മധ്യേയായിരുന്നു അപകടം. ഇടിയുടെ ആഘാതത്തിൽ അലൻ റോഡിൽ തലയടിച്ച് വീണു. അബോധാവസ്ഥയിലായ അലനെ ഉടൻ ഓട്ടോയിൽ ആശുപത്രിയിലെത്തിക്കാൻ ശ്രമിച്ചെങ്കിലും നടന്നില്ല. പിന്നീട്, അപകടത്തിൽപെട്ട ഗുഡ്സ് ഓട്ടോയുടെ പിന്നിൽ കിടത്തിയാണ് സമീപത്തെ ആശുപത്രിയിലെത്തിച്ചത്. പ്രഥമശുശ്രൂഷ നൽകി എറണാകുളത്തെ സ്വകാര്യ ആശുപത്രിയിലേക്ക് മാറ്റിയെങ്കിലും അൽപസമയത്തിനകം മരിച്ചു. പറവൂർ കവലയിലെ ജിംനേഷ്യത്തിൽ പോയി മടങ്ങിവരുകയായിരുന്നു അലൻ. പ്ലസ് ടു പഠനം പൂർത്തിയാക്കിയ അലൻ അടുത്തമാസം ഉപരിപഠനത്തിന് യു.കെയിലേക്ക് പോകാൻ തയാറെടുക്കുകയായിരുന്നു. ആലുവ ജില്ല ആശുപത്രിയിൽ പോസ്റ്റ്മോർട്ടത്തിന് ശേഷം മൃതദേഹം ബന്ധുക്കൾക്ക് വിട്ടുകൊടുത്തു. വ്യാഴാഴ്ച വൈകീട്ട് നാലിന് അശോകപുരം സെന്‍റ് സെബാസ്റ്റ്യൻ ദേവാലയത്തിൽ സംസ്കരിക്കും. മാതാവ്: ജിസോ. സഹോദരൻ: നിതിൻ.
