ആലുവ: ദേശീയപാതയിൽ ലോറിയിടിച്ച് ശരീരത്തിലൂടെ കയറി കാൽനടക്കാരിയായ വീട്ടമ്മ മരിച്ചു. കൊങ്ങോർപ്പിള്ളി മാമ്പിള്ളി വീട്ടിൽ ആൻറണിയുടെ ഭാര്യ സാലിയാണ് (54) മരിച്ചത്. ബുധനാഴ്ച രാവിലെ ഒമ്പതോടെ പറവൂർ കവലയിലായിരുന്നു അപകടം. പറവൂർ കവലയിലെ ഓട്ടോ ടീം മാരുതി വർക്‌ഷോപ് സ്പെയർപാർട്സ് വിഭാഗം ജീവനക്കാരിയാണ്. ഭർത്താവ് ഇരുചക്ര വാഹനത്തിൽ പറവൂർ കവലയിൽ കൊണ്ടുവന്നാക്കിയ സാലി, സ്ഥാപനത്തിലേക്ക് റോഡരികിലൂടെ നടന്നുപോകുകയായിരുന്നു. ഈ സമയം സമീപത്ത് നിർത്തിയിട്ട കണ്ടെയ്നർ ലോറി മുന്നോട്ടെടുത്തപ്പോൾ ഇടിച്ച് തെറിച്ചുവീണ ഇവരുടെമേൽ ഇതേ ലോറി കയറുകയായിരുന്നു.
