കോട്ടയം: പാമ്പാടി പൊത്തൻപുറം കുടിവെള്ള പദ്ധതിയുടെ കുളത്തിൽ യുവാവിനെ മരിച്ചനിലയിൽ കണ്ടെത്തി. ഇലക്കൊടിഞ്ഞി വെള്ളറ ലക്ഷംവീട് കോളനിയിൽ കല്ലടപറമ്പിൽ സജിമോനെയാണ് (45) പുളിഞ്ചുവടിന് സമീപത്തെ കുളത്തിൽ മരിച്ചനിലയിൽ കണ്ടത്. വെള്ളിയാഴ്ച ഉച്ചയോടെയാണ് സംഭവം. സഹോദരിയുമൊന്നിച്ച് റബർതോട്ടത്തിൽ വിറകുശേഖരിക്കാൻ സജിമോനും എത്തിയിരുന്നു. ഏറെ നേരമായിട്ടും കാണാത്തതിനാൽ വീട്ടിൽ പോയെന്നു കരുതി. വീട്ടിലും കാണാതായതോടെ സഹോദരി നടത്തിയ അന്വേഷണത്തിൽ കുളക്കരയിൽ ചെരിപ്പ് കണ്ടെത്തി. സഹോദരിയുടെ നിലവിളികേട്ട് എത്തിയ സമീപവാസികൾ അഗ്നിരക്ഷാസേനയിൽ അറിയിച്ചു. തുടർന്ന്, ഇവരെത്തി പുറത്തെടുത്തപ്പോൾ മരിച്ചനിലയിലായിരുന്നു. പാമ്പാടി താലൂക്ക് ആശുപത്രിയിലെത്തിച്ച മൃതദേഹം ഇൻക്വസ്റ്റ് നടത്തി ജനറൽ ആശുപത്രി മോർച്ചറിയിലേക്ക് മാറ്റി. അവിവാഹിതനായ സജിമോൻ മാനസിക വെല്ലുവിളി നേരിടുന്ന ആളാണെന്ന് നാട്ടുകാർ പറഞ്ഞു.
