മാങ്ങാനം: കാറും ബൈക്കും കൂട്ടിയിടിച്ച് ബൈക്ക് യാത്രികനായ യുവാവ് മരിച്ചു. പനച്ചിക്കാട് ചോഴിയക്കാട് മൂലേപ്പറമ്പിൽ വീട്ടിൽ ദേവസ്യയുടെ മകൻ ജിബിൻ സെബാസ്റ്റ്യനാണ് (23) മരിച്ചത്. ബൈക്കിൽ ഒപ്പമുണ്ടായിരുന്ന പാറക്കൽക്കടവ് സ്വദേശി സുമേഷിന് പരിക്കേറ്റു. ചൊവ്വാഴ്ച വൈകീട്ട് കോട്ടയം-പുതുപ്പള്ളി റൂട്ടിൽ മാങ്ങാനം മന്ദിരം ആശുപത്രിക്ക് സമീപമാണ് അപകടം. കോട്ടയത്തുനിന്ന് പുതുപ്പള്ളി ഭാഗത്തേക്ക് പോകുകയായിരുന്ന കാറിൽ, പുതുപ്പള്ളി ഭാഗത്തുനിന്ന് എത്തിയ ബൈക്ക് ഇടിക്കുകയായിരുന്നു. റോഡിൽ വീണ ജിബിനെ സമീപത്തെ മന്ദിരം സ്വകാര്യ ആശുപത്രിയിൽ എത്തിച്ചെങ്കിലും മരിച്ചു. മൃതദേഹം മന്ദിരം ആശുപത്രി മോർച്ചറിയിൽ. അപകടത്തെ തുടർന്ന് പുതുപ്പള്ളി- കോട്ടയം റൂട്ടിൽ ഗതാഗതം തടസ്സപ്പെട്ടു. ഈസ്റ്റ് പൊലീസ് സ്ഥലത്തെത്തി മേൽനടപടികൾ സ്വീകരിച്ചു. മാതാവ്: വത്സമ്മ. സഹോദരൻ: ബിബിൻ. സംസ്‌കാരം ബുധനാഴ്ച വൈകീട്ട് മൂന്നിന് ഞാലിയാകുഴി സെന്റ് ജയിംസ് സി.എസ്.ഐ പള്ളി സെമിത്തേരിയിൽ.
