കൊച്ചി: കെ.എസ്.ആർ.ടി.സി ബസും ബൈക്കും കൂട്ടിയിടിച്ച് ഓൺലൈൻ ഭക്ഷണ വിതരണം നടത്തുന്ന യുവാവ് മരിച്ചു. കർണാടക കുടക് സ്വദേശി കെ. ആഷിഫാണ് (30) മരിച്ചത്. ശനിയാഴ്ച പുലർച്ച അഞ്ചോടെ ഇടപ്പള്ളി ജങ്ഷന് സമീപമായിരുന്നു അപകടം. ഗുരുവായൂരിലേക്ക് പോകുകയായിരുന്ന ബസിടിച്ച് പരിക്കേറ്റ ആഷിഫിനെ നാട്ടുകാർ സ്വകാര്യ ആശുപത്രിയിൽ എത്തിച്ചെങ്കിലും മരിച്ചു. സ്വിഗിയുടെ ഭക്ഷണ വിതരണ ജീവനക്കാരനായിരുന്നു ആഷിഫ്. ഓർഡർ ചെയ്ത ഭക്ഷണം വാങ്ങാൻ ഇടപ്പള്ളിയിൽ എത്തിയതായിരുന്നുവെന്നാണ് വിവരം. എളമക്കര പൊലീസ് സ്ഥലത്തെത്തി പരിശോധന നടത്തി. സി.സി ടി.വി ദൃശ്യം ശേഖരിച്ചിട്ടുണ്ട്. ആഷിഫിന്റെ മൃതദേഹം എറണാകുളം ജനറൽ ആശുപത്രിയിലെത്തിച്ച് ഇൻക്വസ്റ്റ് നടപടികൾ പൂർത്തിയാക്കി. പോസ്റ്റ്മോർട്ടത്തിന് ശേഷം ബന്ധുക്കൾക്ക് കൈമാറി.
