കൂത്താട്ടുകുളം: നടക്കാവ് റോഡിൽ ഒലിയപ്പുറം കവലയിൽ മിനിബസും ബൈക്കും കൂട്ടിയിടിച്ച് ബൈക്ക് യാത്രികരായ രണ്ട് യുവാക്കൾ മരിച്ചു. പിറവം സ്വദേശികളായ കുടിലിൽ എൽദോസ് ബെന്നി (25), മുളക്കുളം നോർത്ത് ചുള്ളിക്കൽ സി.ആർ. വിഷ്ണു (25) എന്നിവരാണ് മരിച്ചത്. തിങ്കളാഴ്ച വൈകീട്ട് 4.50ഓടെയാണ് അപകടം. എറണാകുളം ഗ്ലോബൽ പബ്ലിക് സ്കൂളിലെ കുട്ടികളുമായി വന്ന മിനിബസാണ് അപകടത്തിൽപെട്ടത്. ബസ് പിറവം ഭാഗത്തുനിന്നും ബൈക്ക് ഉപ്പുകണ്ടം ഭാഗത്തുനിന്നും വരുകയായിരുന്നു. ഒലിയപ്പുറം കവലയിൽനിന്ന് കൂത്താട്ടുകുളത്തേക്ക് തിരിയുന്ന ഭാഗത്തുവെച്ച് കൂട്ടിയിടിക്കുകയായിരുന്നു. നാട്ടുകാർ യുവാക്കളെ കൂത്താട്ടുകുളത്തെ സ്വകാര്യ ആശുപത്രിയിൽ എത്തിച്ചെങ്കിലും മരിച്ചു. ബസിലുണ്ടായിരുന്ന ആറ് കുട്ടികളും പരിക്കില്ലാതെ രക്ഷപ്പെട്ടു. കൂത്താട്ടുകുളം പൊലീസെത്തി വാഹനങ്ങൾ മാറ്റി ഗതാഗതം പുനഃസ്ഥാപിച്ചു. ഇരുവരും അവിവാഹിതരാണ്. വിഷ്ണു റിഫൈനറി ജീവനക്കാരനാണ്. പിതാവ്: സിബി റെജി. മാതാവ്: അനിത (ശൂരനാട്). സഹോദരി: വീണ. എൽദോസിന്‍റെ പിതാവ്: ബെന്നി ചാക്കോ (ഡ്രൈവർ, ആരക്കുന്നം ടോക് എച്ച് എൻജിനീയറിങ് കോളജ്). മാതാവ് ഷൈബി (ഇടയാർ). സഹോദരി: നീതു. മൃതദേഹങ്ങൾ ചൊവ്വാഴ്ച പോസ്റ്റ്മോർട്ടത്തിനുശേഷം ബന്ധുക്കൾക്ക് വിട്ടുകൊടുക്കും. സംസ്കാരം ഉച്ചക്ക് ശേഷം നടക്കും.
