പറവൂർ: നിയന്ത്രണം വിട്ട ഇരുചക്രവാഹനം വൈദ്യുതി പോസ്റ്റിൽ ഇടിച്ചുമറിഞ്ഞ് റോഡിൽ വീണ യാത്രക്കാരി ലോറി കയറി മരിച്ചു. കൊടുങ്ങല്ലൂർ പുല്ലൂറ്റ് ചക്കനാട് ഓളിയിൽ ശിവദാസൻ - ഭാഗ്യലക്ഷ്മി ദമ്പതികളുടെ മകൾ അഖിലയാണ് (22) മരിച്ചത്. പറവൂർ - മൂത്തകുന്നം റൂട്ടിലെ കോൺവന്‍റ് റോഡിൽ വൃന്ദാവൻ ബസ് സ്റ്റോപ്പിനുസമീപം ശനിയാഴ്ച രാത്രി 7.15നാണ് അപകടമുണ്ടായത്. ലോറിയും ഇരുചക്രവാഹനവും ഒരേ ദിശയിലായിരുന്നു. വൈദ്യുതി പോസ്റ്റിൽ തട്ടി ഇരുചക്രവാഹനം മറിഞ്ഞപ്പോൾ അഖില ലോറിയുടെ അടിയിലേക്ക് വീഴുകയായിരുന്നു. തൽക്ഷണം മരിച്ചു. സി.എ പഠനത്തിനുശേഷം എറണാകുളത്തെ സ്വകാര്യ സ്ഥാപനത്തിൽ ജോലി ചെയ്യുകയായിരുന്നു. ജോലി കഴിഞ്ഞു തിരിച്ചുപോകും വഴിയാണ് അപകടമുണ്ടായത്. ലോറി കോട്ടയത്തുനിന്ന് പുണെയിലേക്ക് പോകുകയായിരുന്നു. മൃതദേഹം താലൂക്ക് ആശുപത്രിയിലേക്ക് മാറ്റി. സഹോദരങ്ങൾ: നിഖിൽ (ഗൾഫ്), അമൽ.
