കുമളി: പെരിയാർ കടുവ സങ്കേതത്തിന്‍റെ ഭാഗമായ സത്രത്തിലെ കാഴ്ചകൾ കാണാൻ ജീപ്പിൽ പോയ വിനോദസഞ്ചാരി യാത്രാമധ്യേ കുഴഞ്ഞുവീണ് മരിച്ചു. ശനിയാഴ്ച രാവിലെയായിരുന്നു സംഭവം. തമിഴ്നാട് തൃശ്ചിനാപ്പള്ളി വയലൂർ സ്വദേശിനി തമിഴ്മണിയാണ് (67) മരിച്ചത്. മകനും മരുമകൾക്കുമൊപ്പം കുമളിയിൽനിന്നാണ് ഇവർ വണ്ടിപ്പെരിയാർ സത്രത്തിലേക്ക് ജീപ്പിൽ പുറപ്പെട്ടത്. വഴിമധ്യേ ജീപ്പിൽനിന്ന് ഇറങ്ങിയപ്പോഴാണ് കുഴഞ്ഞുവീണത്. ഉടൻ വണ്ടിപ്പെരിയാർ ആശുപത്രിയിൽ പ്രവേശിപ്പിച്ചെങ്കിലും മരിച്ചു. പൊലീസ് നടപടി പൂർത്തിയാക്കി മൃതദേഹം ബന്ധുക്കൾക്ക് വിട്ടുനൽകി. നാട്ടിലേക്ക് കൊണ്ടുപോയി.
