കൽപറ്റ: ദേശീയപാത 766ൽ മുട്ടിൽ കൊളവയലിൽ കാറപകടത്തിൽ നാലു വയസ്സുകാരി മരിച്ചു. മുട്ടിൽ കൊളവയൽ ഒളവത്തൂരിന് സമീപം വ്യാഴാഴ്ച വൈകീട്ട് അഞ്ചോടെയാണ് അപകടം. കൽപറ്റ മുണ്ടേരി ഗവ. വൊക്കേഷനൽ ഹയർ സെക്കൻഡറി സ്കൂളിലെ എൽ.പി വിഭാഗം അധ്യാപകൻ കൊളവയൽ ഒളവത്തൂർ തറപ്പുതൊട്ടിയിൽ സജി ആന്റോയുടെയും പിണങ്ങോട് ഗവ.യു.പി സ്കൂൾ അധ്യാപിക പ്രിൻസിയുടെയും ഇളയ മകളായ എൽ.കെ.ജി വിദ്യാർഥിനി ഐയ്‍ലിൻ തെരേസ ജോസഫ് (4) ആണ് മരിച്ചത്. ഐയ്‍ലിന്‍റെ സഹോദരി ഇസയുടെ ജന്മദിനത്തിനാഘോഷത്തിന് വീട്ടിലേക്ക് പോകുന്നതിനിടെയാണ് അപകടം. കൊളവയൽ ഒളവത്തൂരിന് സമീപം ഇവർ സഞ്ചരിച്ചിരുന്ന കാറിൽ മറ്റൊരു കാർ ഇടിക്കുകയായിരുന്നു. ഇടിയുടെ ആഘാതത്തിൽ കാറിലുണ്ടായിരുന്ന ഐയ്‍ലിൻ പുറത്തേക്ക് തെറിച്ചുവീണു. കൽപറ്റ ജനറൽ ആശുപത്രിയിലെത്തിച്ചെങ്കിലും മരിച്ചു. ഐയ്‍ലിന്‍റെ സഹോദരിമാർ: ഇവാനിയ മെറിൻ ജോസഫ്, ഇസ ബ്രിജിത്ത് ജോസഫ് (രണ്ടുപേരും ജി.വി.എച്ച്.എസ്.എസ് മുണ്ടേരി), ജുവൽ ആൻ ജോസഫ് (കൽപറ്റ ഡി പോൾ സ്കൂൾ).
