ഹരിപ്പാട്: വിവാഹ വാർഷികാഘോഷ ദിനത്തിൽ സാധനങ്ങൾ വാങ്ങാൻ ബൈക്കിൽ പോകുന്നതിനിടെ അപകടത്തിൽപെട്ട് പരിക്കേറ്റ് ചികിത്സയിലിരുന്ന യുവാവ് മരിച്ചു. കാർത്തികപ്പള്ളി പുതുക്കുണ്ടം വെട്ടുതുരുത്തിൽ ശശി-പൊന്നമ്മ ദമ്പതികളുടെ മകൻ രാകേഷാണ് (35) മരിച്ചത്. കഴിഞ്ഞ 21ന് വൈകീട്ട് തൃക്കുന്നപ്പുഴ മൂത്തേരിൽ ജങ്ഷന് തെക്കുവശത്തായിരുന്നു അപകടം. ബൈക്കിൽ സഞ്ചരിക്കുകയായിരുന്ന രാകേഷിനെ ഇൻസുലേറ്റഡ് വാൻ തട്ടിയിട്ട ശേഷം നിർത്താതെ പോവുകയായിരുന്നു. തലക്കും നട്ടെല്ലിനും ഗുരുതര പരിക്കേറ്റ രാകേഷിനെ വണ്ടാനം മെഡിക്കൽ കോളജ് ആശുപത്രിയിലും തുടർന്ന് എറണാകുളത്തെ സ്വകാര്യ ആശുപത്രിയിലും പ്രവേശിപ്പിച്ചെങ്കിലും മരിച്ചു. അപകടം ഉണ്ടാക്കിയ വാഹനം പൊലീസ് തിരിച്ചറിഞ്ഞിട്ടുണ്ട്. ഭാര്യ: മാലിനി. മക്കൾ: ആദ്യനാഥ്, ആദിദേവ്. സഹോദരൻ: കലേഷ്.
