കായംകുളം: നെഞ്ചുവേദന അനുഭവപ്പെട്ട യുവാവ് ആശുപത്രിയിൽ കുഴഞ്ഞുവീണ് മരിച്ചു. ആറാട്ടുപുഴ മണിയൻ ചിറയിൽ പരേതനായ ഇബ്രാഹീംകുട്ടിയുടെ മകൻ കായംകുളം പുത്തൻതെരുവ് പള്ളിക്കുസമീപം പടിപ്പുരക്കൽ പടീറ്റതിൽ നിസാറാണ് (46) മരിച്ചത്. എറണാകുളത്ത് ഹോട്ടൽ ജീവനക്കാരനായ നിസാർ കടയിലേക്ക് പോകുന്നതിന് കായംകുളം ബസ്സ്റ്റാൻഡിൽ നിൽക്കുമ്പോഴാണ് നെഞ്ചുവേദനയുണ്ടായത്. നടന്ന് തൊട്ടടുത്ത കായംകുളം താലൂക്ക് ആശുപത്രിയിലെത്തി. അവിടെ നിന്ന ഒരാളുടെ കൈയിൽ മൊബൈൽ ഫോൺ നൽകി ഏതെങ്കിലും നമ്പറിൽ വിളിച്ച് വിവരം അറിയിക്കാൻ പറഞ്ഞശേഷം ഡോക്ടറെ കണ്ടു. ഇ.സി.ജി എടുത്തപ്പോൾ, പെട്ടെന്ന് മെഡിക്കൽ കോളജ് ആശുപത്രിയിൽ എത്തണമെന്ന് ഡോക്ടർ നിർദേശിച്ചു. തുടർന്ന് മിനിറ്റുകൾക്കുള്ളിൽ കുഴഞ്ഞുവീണ് മരിക്കുകയായിരുന്നു. മാതാവ്: പരേതയായ സൈനബ. റസീനയാണ് ഭാര്യ. മക്കൾ: റിസാന, നിസാന. മരുമകൻ: നൂറുദ്ദീൻ (ദുബൈ).
