വൈത്തിരി: വയനാട്ടിലെ തളിമല പാത്തിപ്പുഴ വെള്ളച്ചാട്ടത്തിൽ വീണ് യുവാവ് മരിച്ചു. പെരുന്തട്ട നടുപ്പാറ ശ്രീലക്ഷ്മി നിവാസിൽ അഭിജിത്താണ് (20) തിരുവോണ ദിവസമായ വ്യാഴാഴ്ച ഉച്ചക്കുശേഷം മൂന്നോടെയുണ്ടായ അപകടത്തിൽ മരിച്ചത്. അപകടത്തിൽപെട്ട പെരുന്തട്ട സ്വദേശി ശ്രീഹരിയെ പരിക്കുകളോടെ മേപ്പാടി വിംസ് ആശുപത്രിയിൽ പ്രവേശിപ്പിച്ചു. കൽപറ്റ പെരുന്തട്ട സ്വദേശികളായ ഏഴു പേരടങ്ങിയ സംഘം വെള്ളച്ചാട്ടത്തിന് മുകളിലെത്തുകയായിരുന്നു. ഇതിൽ രണ്ടുപേരാണ് 20 അടി താഴ്ചയിലേക്ക് വീണത്. വെള്ളച്ചാട്ടത്തിനു താഴെയുള്ള പാറക്കെട്ടിലേക്കാണ് വീണത്. വനം വകുപ്പ് ഉദ്യോഗസ്ഥരും നാട്ടുകാരും ചേർന്ന് ഇരുവരെയും മുകളിലെത്തിച്ചു. വൈത്തിരി പൊലീസും സ്ഥലത്തെത്തി. വീഴ്ചയിൽ തലക്കു ഗുരുതരമായി പരിക്കേറ്റ അഭിജിത് ആശുപത്രിയിലെത്തിയപ്പോഴേക്കും മരിച്ചിരുന്നു. അഭിജിത്തിന്റെ പിതാവ് സഹദേവൻ ചുണ്ടേൽ അങ്ങാടിയിലെ ചുമട്ടുതൊഴിലാളിയാണ്. മാതാവ്: ശാരദ.
