സുൽത്താൻ ബത്തേരി: ദേശീയപാതയിൽ കൃഷ്ണഗിരിക്കടുത്ത് മിനിലോറിയിടിച്ച് ബൈക്ക് യാത്രക്കാരൻ മരിച്ചു. കൃഷ്ണഗിരിയിലെ സ്വകാര്യ റസ്റ്റാറന്റിലെ ജീവനക്കാരൻ മീനങ്ങാടി അമ്പലപ്പടി മന്നത്ത്കുന്ന് കാലിക്കൽ ചാമി (60) ആണ് മരിച്ചത്.
മീനങ്ങാടിയിൽനിന്ന് കൃഷ്ണഗിരിയിലെ സ്ഥാപനത്തിലേക്കു പോകുമ്പോൾ ശനിയാഴ്ച രാത്രിയാണ് അപകടം. മറ്റൊരു വാഹനത്തെ മറികടന്നുവന്ന മിനി പാർസൽ ലോറി ബൈക്കിൽ ഇടിച്ചാണ് അപകടം. കാലിന് ഗുരുതര പരിക്കേറ്റ ചാമിയെ കൽപറ്റയിലെ സ്വകാര്യ ആശുപത്രിയിലും പിന്നീട് കോഴിക്കോട് മെഡിക്കൽ കോളജ് ആശുപത്രിയിലേക്കും കൊണ്ടുപോയി. എന്നാൽ, ഈങ്ങാപ്പുഴ എത്തുമ്പോഴേക്കും ചാമി മരിച്ചു. ഭാര്യ: ബിന്ദു. മക്കൾ: നിരോഷ്മ, സൈനോഷ്മ.
