കോതമംഗലം: ബൈക്കപകടത്തില്‍ പരിക്കേറ്റ് ചികിത്സയിലിരുന്ന വിദ്യാര്‍ഥിനി മരിച്ചു. മാവുടിയിൽ വാടകക്ക് താമസിക്കുന്ന കാഞ്ഞിരംതടത്തില്‍ എം.കെ. സുനിലിന്‍റെ മകൾ മേഘയാണ് (20) മരിച്ചത്.
കഴിഞ്ഞ ദിവസം വൈകീട്ട് അടിവാട് തെക്കേക്കവലയിലായിരുന്നു സംഭവം. സുനില്‍ ഓടിച്ച ബൈക്ക് നിയന്ത്രണം വിട്ട് സമീപത്തെ കാനയിലേക്ക് പതിക്കുകയായിരുന്നു. ഗുരുതര പരിക്കേറ്റ ഇരുവരെയും ആലുവ രാജഗിരി ആശുപത്രിയിൽ പ്രവേശിപ്പിച്ചു. തിങ്കളാഴ്ച വൈകീട്ട് മൂന്നോടെയാണ് മേഘ മരിച്ചത്. പോത്താനിക്കാട്ട് ബാര്‍ബര്‍ ഷോപ് നടത്തുകയാണ് സുനില്‍. പൈങ്ങോട്ടൂർ ശ്രീ നാരായണ കോളജിലെ അവസാനവർഷ ബി.കോം ബിരുദ വിദ്യാർഥിനിയാണ് മേഘ. കുവൈത്തിലായിരുന്ന മാതാവ് ഷൈജ വിവരമറിഞ്ഞ് നാട്ടിലെത്തി. സഹോദരി: സ്‌നേഹ. സംസ്കാരം ചൊവ്വാഴ്ച ഉച്ചക്കുശേഷം പോത്താനിക്കാട് തൃക്കേപ്പടിയിലുള്ള തറവാട്ട് വീട്ടിൽ.
