കോട്ടയം: നിയന്ത്രണംവിട്ട ബൈക്ക് വൈദ്യുതിപോസ്റ്റിലിടിച്ച് യുവാവ് മരിച്ചു. കടുത്തുരുത്തി മൂർത്തിക്കൽ പരേതനായ ജോസിന്‍റെ മകൻ ജെസ്വിൻ ജോസാണ് (27) മരിച്ചത്. ഇയാൾക്കൊപ്പം ബൈക്കിലുണ്ടായിരുന്ന പാക്കിൽ സ്വദേശിയായ പുത്തൻപറമ്പിൽ അജിത് പരിക്കേറ്റ് ചികിത്സയിലാണ്. വെള്ളിയാഴ്ച രാത്രി ചിങ്ങവനം പന്നിമറ്റം റെയിൽവേ ഓവർബ്രിഡ്ജിന് സമീപമായിരുന്നു അപകടം. നിയന്ത്രണംവിട്ട ബൈക്ക് റോഡരികിലെ വൈദ്യുതി പോസ്റ്റിൽ ഇടിക്കുകയായിരുന്നു. ഇടിയുടെ ആഘാതത്തിൽ റോഡിൽ വീണ യുവാവിനെ ഇതുവഴി എത്തിയ പൊലീസ് ജീപ്പിൽ ജില്ല ജനറൽ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. കുഴിമറ്റത്തുള്ള അമ്മവീട്ടിലേക്ക് പോകുകയായിരുന്നു ജെസ്വിൻ.
10 വർഷം മുമ്പ് ഇറിഗേഷൻ വകുപ്പ് ജോലിക്കാരനായ ജസ്വിന്‍റെ പിതാവ് മരിച്ചതും അപകടത്തിലാണ്. പിതാവിന്‍റെ ജോലി ലഭിച്ച ജസ്വിൻ ഇറിഗേഷൻ വകുപ്പിൽ ക്ലർക്കായിരുന്നു. മാതാവ്: അനില. സഹോദരങ്ങൾ: ജേക്കബ്, ജോയൽ. സംസ്‌കാരം പിന്നീട്.
