പറവൂർ: ദേശീയപാത 66 വികസനത്തിനായി ഏറ്റെടുത്ത കെട്ടിടം പൊളിക്കുന്നതിനിടെ തൂൺ തകർന്നുവീണ് ബിഹാർ സ്വദേശി നസറുല്ല മിയ (47) മരിച്ചു. ചൊവ്വാഴ്ച ഉച്ചക്ക് 12.30ന് ചെറിയപ്പിള്ളിയിലെ എസ്.എൻ.ഡി.പി ശാഖ കെട്ടിടം പൊളിക്കുന്നതിനിടെയാണ് അപകടം. കൊടുങ്ങല്ലൂർ സ്വദേശിയായ ശ്രീഷ് എന്ന കരാറുകാരന്റെ തൊഴിലാളിയായ നസറുല്ല മിയ കൊടുങ്ങല്ലൂർ മൂന്നുപീടികയിലാണ് താമസം. ഭാര്യയും മൂന്ന് മക്കളും ബിഹാറിലാണ്. സ്ലാബിന്റെ അടിയിൽ അകപ്പെട്ട ഇയാളെ കൂടെയുണ്ടായിരുന്ന തൊഴിലാളികളും നാട്ടുകാരും ചേർന്നാണ് പുറത്തെടുത്തത്. വയറിനും നട്ടെല്ലിനും കാലുകൾക്കും ഗുരുതര പരിക്കേറ്റിരുന്നു. ഉടൻ എറണാകുളം മെഡിക്കൽ കോളജിലേക്ക് കൊണ്ടുപോയെങ്കിലും മരിച്ചു. മൃതദേഹം മെഡിക്കൽ കോളജ് മോർച്ചറിയിൽ. സംസ്കാരം പിന്നീട്.
