അടിമാലി: റോഡിൽനിന്ന് തടി വലിച്ചുകയറ്റുന്നതിനിടെ ട്രാക്ടർ മറിഞ്ഞ് ഡ്രൈവർ മരിച്ചു. മുരിക്കാശ്ശേരി നെടുംതറയിൽ സത്യന്‍റെ മകൻ ബിജുവാണ് (43) മരിച്ചത്. ചൊവ്വാഴ്ച ഉച്ചക്ക് രണ്ടോടെയാണ് അപകടം. കൊന്നത്തടി മുതിരപ്പുഴ സ്വപ്പടി സിറ്റിയിൽ റോഡിലേക്ക് തടി വലിച്ചുകയറ്റാൻ കൊണ്ടുവന്ന ട്രാക്ടറാണ് തിട്ടയിടിഞ്ഞ് മറിഞ്ഞത്. ബിജുവാണ് വാഹനം ഓടിച്ചിരുന്നത്. ആദ്യം തടി വലിച്ചപ്പോൾ റോഡിന്‍റെ മൺതിട്ടയിടിഞ്ഞ് വാഹനം ചരിഞ്ഞു. ഉടൻ വടംകൊണ്ട് കെട്ടിനിർത്തി. വീണ്ടും തടി വലിക്കുന്നതിനിടെ ട്രാക്ടർ മറിഞ്ഞപ്പോൾ ബിജു വാഹനത്തിൽനിന്ന് ചാടി. തലയിടിച്ചാണ് വീണത്. തലക്കേറ്റ ഗുരുതര പരിക്കാണ് മരണകാരണം. അടിമാലിയിലെ ആശുപത്രിയിൽ എത്തിച്ചെങ്കിലും മരിച്ചു. മൃതദേഹം ആശുപത്രി മോർച്ചറിയിൽ. ഭാര്യ: കീരിത്തോട് വരിക്കപ്ലാക്കൽ കുടുംബാംഗം സോണി. മക്കൾ: ശ്രീഹരി, ഗൗരി.
