പാലാ: ളാലം തോട്ടിൽ യുവാവിനെ മരിച്ചനിലയിൽ കണ്ടെത്തി. കടപ്ലാമറ്റം കടപ്പൂര് പുറ്റനാൽ വിനോദ് മോഹനാണ് (45) മരിച്ചത്. തിങ്കളാഴ്ച വൈകീട്ട് റിവർവ്യൂ റോഡിൽനിന്ന് ഒരാൾ തോട്ടിലേക്ക് ചാടിയതായി സൂചന ലഭിച്ചിരുന്നു. തുടർന്ന് പാലായിൽനിന്ന് ഫയർ ആൻഡ് റെസ്ക്യു യൂനിറ്റ് എത്തി രാത്രി തിരച്ചിൽ നടത്തിയെങ്കിലും കണ്ടെത്തിയില്ല. ചൊവ്വാഴ്ച ഉച്ചക്ക് 12.15ഓടെ മൃതദേഹം കണ്ടെത്തുകയായിരുന്നു. കടപ്ലാമറ്റം വില്ലേജിലെ ഫീൽഡ് അസിസ്റ്റൻറ് ആയിരുന്നു വിനോദ്. തിങ്കളാഴ്ച വീട്ടിൽനിന്ന് പാലാക്ക് പോയതാണ്. ആർ.ഡി.ഒയുടെ സാന്നിധ്യത്തിൽ ഇൻക്വസ്റ്റ് പരിശോധന പൂർത്തിയാക്കി മൃതദേഹം മോർച്ചറിയിലേക്ക് മാറ്റി. സംസ്കാരം ബുധനാഴ്ച ഉച്ചക്ക് 12ന് കടപ്പൂരിലെ വസതിയിൽ നടക്കും. വിനോദിന്‍റെ ഭാര്യ പ്രസന്ന അരീപ്പറമ്പ് അയ്യൻകുന്നേൽ കുടുംബാംഗമാണ്. മകൻ: അഖിലേഷ് (കടപ്പൂർ ഗവ. എച്ച്.എസ് വിദ്യാർഥി).
