മുഖത്തല: മുതിർന്ന സി.പി.ഐ നേതാവും ജില്ല കൗൺസിൽ അംഗവുമായിരുന്ന മുഖത്തല നടുവിലക്കര പ്ലാവിള വീട്ടിൽ ആർ. ചെല്ലപ്പൻപിള്ള (93-റിട്ട. അധ്യാപകൻ നെടുമ്പന യു.പി.എസ്.) നിര്യാതനായി. സി.പി.ഐ ഇരവിപുരം മണ്ഡലം കമ്മിറ്റി മുൻ സെക്രട്ടറിയാണ്. പഴയ ഇരവിപുരം മണ്ഡലത്തിന്റെ വിവിധ പഞ്ചായത്തുകളിൽ കമ്യൂണിസ്റ്റ് പാർട്ടിയുടെ പ്രവർത്തനത്തിൽ മുഖ്യപങ്ക് വഹിക്കുകയും മണ്ഡലത്തിലുടനീളം കശുവണ്ടി തൊഴിലാളികളെയും കർഷകത്തൊഴിലാളികളെയും സംഘടിപ്പിക്കുന്നതിൽ മുഖ്യപങ്ക് വഹിക്കുകയും നിരവധി സമരങ്ങൾക്ക് നേതൃത്വം നൽകുകയും ചെയ്തിട്ടുണ്ട്. കല്ലുവെട്ടാൻകുഴി ക്ഷീരോൽപാദക സഹകരണ സംഘം മുൻ പ്രസിഡന്റ്, മുഖത്തല ഗ്രാമോദ്ധാരണ ട്രസ്റ്റ് മുൻ ഭരണസമിതി അംഗം, തൃക്കോവിൽവട്ടം പഞ്ചായത്ത് സർവിസ് സഹകരണ ബാങ്ക് മുൻ ഭരണസമിതി അംഗം, സി. അച്യുതമേനോൻ സഹകരണ ആശുപത്രി ഭരണസമിതി അംഗം എന്നീ നിലകളിൽ പ്രവർത്തിച്ചിട്ടുണ്ട്. ഭാര്യ: പത്മാവതിയമ്മ. മക്കൾ: പ്രിയ, പ്രീത, പ്രദീപ് (സി.പി.ഐ മുഖത്തല മണ്ഡലം സെക്രട്ടറി, മുൻ ജില്ല പഞ്ചായത്ത് അംഗം). മരുമക്കൾ: രഞ്ജിത്ത്, സുനിൽകുമാർ. സംസ്കാരം ചൊവ്വാഴ്ച ഉച്ചക്ക് 12.30ന് വീട്ടുവളപ്പിൽ.
