തൃപ്പൂണിത്തുറ: ബൈക്കുകള്‍ കൂട്ടിയിടിച്ച് യുവാവ് മരിച്ചു. തേവര കോന്തുരുത്തി പാദുവ റോഡില്‍ വടക്കേടത്ത് മാര്‍ട്ടിന്റെ മകന്‍ ആദിഷാണ് (23) മരിച്ചത്. ബുധനാഴ്ച ഉച്ചക്ക് 12ന് കൊച്ചി റിഫൈനറി റോഡില്‍ അലിയാര്‍ പാലത്തിന് സമീപത്താണ് സംഭവം.
ഇരുമ്പനത്തുള്ള ഇവന്റ് മാനേജ്മെന്റ് ഗ്രൂപ്പില്‍ താല്‍ക്കാലിക ജീവനക്കാരനായ ആദിഷ് ഓഫിസിലേക്ക് ബൈക്കില്‍ സഞ്ചരിക്കവെ മറ്റൊരു ബൈക്കുമായി കൂട്ടിയിടിക്കുകയായിരുന്നു. അപകടത്തില്‍ ആദിഷിന്റെ കഴുത്തിന് മുറിവേറ്റ് ഗുരുതരമായി പരിക്കേറ്റു. ചോരവാര്‍ന്ന് റോഡില്‍ കിടന്ന യുവാവിനെ സമീപത്തുണ്ടായിരുന്നവര്‍ ഓട്ടോയില്‍ ആശുപത്രിയിലെത്തിച്ചെങ്കിലും മരിച്ചിരുന്നു. മൃതദേഹം തൃപ്പൂണിത്തുറ താലൂക്ക് ആശുപത്രി മോര്‍ച്ചറിയില്‍.
