കൊച്ചി: യുവാവിനെ ദുരൂഹ സാഹചര്യത്തിൽ മരിച്ചനിലയിൽ കണ്ടെത്തി. കാസർകോട്‌ ചുള്ളി കൊച്ചുകരോട്ട്‌ വീട്ടിൽ ജോയ്‌ തോമസിന്‍റെ മകൻ സജു കെ. ജോയിയെയാണ്‌ (44) മാർക്കറ്റ്‌ റോഡ്‌ ഡി.ഡി അങ്ങാടി കെട്ടിടത്തിന് താഴെ മരിച്ച നിലയിൽ കണ്ടെത്തിയത്‌. ഇയാൾ കെട്ടിടത്തിനുമുകളിൽനിന്ന്‌ വീണു മരിച്ചതായി സംശയിക്കുന്നതായി സെൻട്രൽ പൊലീസ്‌ പറഞ്ഞു. ബുധൻ പുലർച്ചയാണ്‌ സജുവിന്‍റെ മൃതദേഹം കണ്ടെത്തിയത്‌. രക്തത്തിൽ കുളിച്ചനിലയിൽ കണ്ടെത്തിയ മൃതദേഹത്തിൽനിന്ന്‌ ലഭിച്ച ഡ്രൈവിങ്‌ ലൈസൻസിൽനിന്നാണ്‌ ആളെ വ്യക്തമായത്‌. ഇയാൾ എറണാകുളത്ത്‌ ജോലി അന്വേഷിച്ചുവന്നതായാണ്‌ പ്രാഥമിക സൂചന. മൃതദേഹം എറണാകുളം ജനറൽ ആശുപത്രി മോർച്ചറിയിൽ. പോസ്‌റ്റ്‌മോർട്ടത്തിനുശേഷം വ്യാഴാഴ്‌ച ബന്ധുക്കൾക്ക്‌ വിട്ടുകൊടുക്കും.
