മൂന്നുപേര്‍ക്ക് ഗുരുതര പരിക്ക്
മാവേലിക്കര: ബൈക്കും സ്‌കൂട്ടറും കൂട്ടിയിടിച്ച് ഒരാള്‍ മരിച്ചു. മൂന്നുപേര്‍ക്ക് ഗുരുതര പരിക്കേറ്റു. തെക്കേക്കര വരേണിക്കല്‍ ശ്രീസദനത്തില്‍ ശ്രീകുമാറാണ് (54) മരിച്ചത്. ഒപ്പമുണ്ടായിരുന്ന ബന്ധു മേനാമ്പള്ളി ഉഷാസദനത്തില്‍ കൃഷ്ണപിള്ള (60), ചെങ്ങന്നൂര്‍ ചെറിയനാട് സ്വദേശി മീനാക്ഷി, വെണ്‍മണി സ്വദേശി ആദിത്യന്‍ എന്നിവർക്കാണ് പരിക്കേറ്റത്. കൃഷ്ണപിള്ളയെ മാവേലിക്കരയിലെ സ്വകാര്യ ആശുപത്രിയില്‍ പ്രവേശിപ്പിച്ചു. ആദിത്യനെയും മീനാക്ഷിയെയും തിരുവല്ലയിലെ സ്വകാര്യ മെഡിക്കല്‍ കോളജുകളില്‍ പ്രവേശിപ്പിച്ചു. ഇരുവരും മാവേലിക്കര ഐ.എച്ച്.ആര്‍.ഡി കോളജിലെ വിദ്യാര്‍ഥികളാണ്. ശനിയാഴ്ച വൈകീട്ട് 3.35ന് ചെട്ടികുളങ്ങര വലിക്കോലില്‍ ജങ്ഷന് സമീപമാണ് അപകടം നടന്നത്. ചെട്ടികുളങ്ങര സ്റ്റാര്‍ വര്‍ക്ക്ഷോപ് ഉടമയായ കൃഷ്ണപിള്ള ഓടിച്ച ആക്ടിവ സ്‌കൂട്ടറുമായി ആദിത്യന്‍ ഓടിച്ച ഡ്യൂക്ക് ബൈക്ക് കൂട്ടിയിടിക്കുകയായിരുന്നു. ഇടിയുടെ ആഘാതത്തില്‍ റോഡിൽ തെറിച്ചുവീണാണ് ശ്രീകുമാര്‍ മരിച്ചത്. ശ്രീകുമാറിന്‍റെ ഭാര്യ പ്രസന്ന. മക്കള്‍: ശ്രീലക്ഷ്മി, പാര്‍വതി. മരുമകന്‍: ശരത്. മൃതദേഹം കായംകുളം താലൂക്ക് ആശുപത്രി മോര്‍ച്ചറിയില്‍.
