കടുത്തുരുത്തി: കീഴൂരില്‍ ടിപ്പര്‍ലോറിയും ബൈക്കും കൂട്ടിയിടിച്ച് ബൈക്ക് യാത്രികനായ വിദ്യാര്‍ഥി മരിച്ചു. കൂടെയുണ്ടായിരുന്ന സുഹൃത്തിന് ഗുരുതര പരിക്ക്. കീഴൂര്‍ ചൂണ്ടേക്കാലായില്‍ പരേതനായ പീറ്റര്‍ (ബൈജു)- സോന ദമ്പതികളുടെ മകനും കീഴൂര്‍ ഡി.ബി കോളജ് ബി.എ മലയാളം രണ്ടാംവര്‍ഷ വിദ്യാര്‍ഥിയുമായ അബിന്‍ പീറ്ററാണ് (19) മരിച്ചത്. കൂടെയുണ്ടായിരുന്ന സുഹൃത്ത് തലയോലപ്പറമ്പ് മിഠായിക്കുന്നം താമരശ്ശേരില്‍ വിധുകൃഷ്ണനെ (22) ഗുരുതര പരിക്കോടെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ചൊവ്വാഴ്ച ഉച്ചക്ക് 12ഓടെ തലയോലപ്പറമ്പ്-പെരുവ റോഡില്‍ കീഴൂര്‍ കാരിക്കോട് കവലക്ക് സമീപമാണ് അപകടം. ഒരേ ദിശയിലേക്ക് പോകുകയായിരുന്നു ഇരുവാഹനവും. ടിപ്പറിനെ മറികടക്കാന്‍ ശ്രമിക്കുന്നതിനിടെ വലതുഭാഗത്തേക്ക് തിരിഞ്ഞ ലോറിക്കടിയില്‍ ഇവർ സഞ്ചരിച്ച ബൈക്ക് പെടുകയായിരുന്നു. അപകടത്തിൽ നിയന്ത്രണംവിട്ട ടിപ്പര്‍ലോറി റോഡരികിലെ വൈദ്യുതി പോസ്റ്റും സ്വകാര്യ വ്യക്തിയുടെ മതിലും ഇടിച്ച് തകര്‍ത്താണ് നിന്നത്. ടിപ്പറിനടിയില്‍ കുടുങ്ങിയ ഇരുവരെയും നാട്ടുകാര്‍ ഉടന്‍ പൊതിയിലെ സ്വകാര്യ ആശുപത്രിയില്‍ എത്തിച്ചെങ്കിലും അബിനെ രക്ഷിക്കാനായില്ല. ടിപ്പര്‍ ഇടിച്ചതിനെ തുടര്‍ന്ന് വൈദ്യുതി പോസ്റ്റ് ഒടിഞ്ഞ് കമ്പികള്‍ റോഡിലേക്ക് വീണെങ്കിലും ഉടന്‍ വൈദ്യുതി വിതരണം നിലച്ചതിനാല്‍ കൂടുതല്‍ ദുരന്തം ഒഴിവായി. വെള്ളൂര്‍ പൊലീസ് സ്ഥലത്തെത്തി നടപടി സ്വീകരിച്ചു. അബിന്‍റെ സഹോദരൻ: സ്‌റ്റെഫിന്‍. സംസ്‌കാരം പിന്നീട്.
