കാക്കനാട്: ഇൻഫോപാർക്കിന് സമീപമുണ്ടായ വാഹനാപകടത്തിൽ യുവാവ് മരിച്ചു. കാക്കനാട് അത്താണി നെടുംകുളങ്ങരമല വീട്ടിൽ അനിയപ്പന്‍റെ മകൻ അമ്പാടിയാണ് (20) മരിച്ചത്. ഒപ്പമുണ്ടായിരുന്ന സുഹൃത്ത് ആകാശ് ഗുരുതര പരിക്കോടെ ചികിത്സയിലാണ്.
നിലംപതിഞ്ഞിമുകൾ കുഴിക്കാട്ടുമൂല റോഡിൽ തിങ്കളാഴ്ച രാത്രി ഒൻപതരയോടെയാണ് സംഭവം. സുഹൃത്തായ ആകാശിനൊപ്പം ഇൻഫോപാർക്ക് ഭാഗത്തെ ഫുട്ബാൾ ടർഫിൽനിന്ന് മടങ്ങുന്നതിനിടെയാണ് അപകടം. കുഴിക്കാട്ടുമൂല ഭാഗത്തേക്ക് പോവുകയായിരുന്ന അമ്പാടി ഓടിച്ചിരുന്ന ഇരുചക്രവാഹനം വഴിയരികിലെ റിസെൻസ് സൂപ്പർ മാർക്കറ്റിന് സമീപം മുന്നിലുണ്ടായിരുന്ന കാർ വേഗം കുറച്ചപ്പോൾ കാറിന്റെ വലതുവശത്ത് തട്ടുകയായിരുന്നു. തുടർന്ന് റോഡിന്റെ വലതുഭാഗത്തെ മതിലിലും പോസ്റ്റിലും ഇടിച്ച് സമീപം നിർത്തിയിട്ടിരുന്ന മറ്റൊരു കാറിന്റെ അടിയിലേക്ക് ഇവർ വീഴുകയായിരുന്നുവെന്ന് പൊലീസ് പറഞ്ഞു. തലക്ക് ഗുരുതരപരിക്കേറ്റ അമ്പാടിയെ കാക്കനാട് സൺറൈസ് ആശുപത്രിയിൽ എത്തിച്ചെങ്കിലും മരിച്ചു. പരിക്കേറ്റ സുഹൃത്ത് ആകാശിനെ കൊച്ചി അമൃത ആശുപത്രിയിൽ പ്രവേശിപ്പിച്ചു.
അമ്പാടിയുടെ മൃതദേഹം ചൊവ്വാഴ്ച ഉച്ചക്ക് ഒന്നരയോടെ അത്താണി പൊതുശ്മശാനത്തിൽ സംസ്കരിച്ചു. ഓമനയാണ് അമ്പാടിയുടെ മാതാവ്. സഹോദരി: അശ്വതി.
