വണ്ണപ്പുറം: കംപ്രസർ വാഹനം മറിഞ്ഞ് അടിയിൽപെട്ട് ഡ്രൈവർ മരിച്ചു. വെൺമറ്റം ഇല്ലിക്കൽ അഖിലാണ് (26) മരിച്ചത്.
വണ്ണപ്പുറം നാൽപതേക്കറിനും വെണ്മറ്റത്തിനും ഇടയിൽ ബുധനാഴ്ച വൈകീട്ട് 6.45നാണ് സംഭവം. നിയന്ത്രണം നഷ്ടപ്പെട്ട കംപ്രസർ തിട്ടയിൽ ഇടിച്ച് മറിയുകയായിരുന്നു. അടിയിൽപെട്ട അഖിലിനെ നാട്ടുകാർ കംപ്രസർ ഉയർത്തി ഉടൻ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. കൂടെയുണ്ടായിരുന്ന കോളായിൽ ബിനോയിയുടെ മകൻ കാർത്തികിന്‍റെ (17) കാലിന് പരിക്കേറ്റു.
അഖിലിന്‍റെ മൃതദേഹം തൊടുപുഴ ജില്ല ആശുപത്രി മോർച്ചറിയിൽ. കാളിയാർ പൊലീസ് നടപടി സ്വീകരിച്ചു. പിതാവ്: അനു. മാതാവ്: മിനി. ഭാര്യ: ബിന്യ. സഹോദരൻ: അനന്തു.
