അമ്പലപ്പുഴ: ഗൃഹനാഥനെ തോട്ടിൽ മരിച്ചനിലയിൽ കണ്ടെത്തി. അമ്പലപ്പുഴ ആമയിട പതിനഞ്ചിൽ വീട്ടിൽ അജിത് കെ. നായരെയാണ് (60) മരിച്ചനിലയിൽ കണ്ടെത്തിയത്. ബുധനാഴ്ച രാവിലെ എട്ടോടെ കരുമാടിതോട്ടിൽ മൃതദേഹം ഒഴുകി നടക്കുന്നത് കണ്ട് നാട്ടുകാർ അമ്പലപ്പുഴ പൊലീസിനെ വിവരം അറിയിക്കുകയായിരുന്നു.
മൈക്ക് സെറ്റ് ഓപറേറ്റർ ആയിരുന്നു അജിത്. രാത്രിയിൽ ഇയാൾ വീട്ടിൽ എത്തിയിരുന്നില്ല. ഇയാളുടെ സ്കൂട്ടർ കരുമാടി പമ്പ് ഹൗസ് ഭാഗത്ത് പാർക്ക് ചെയ്തിരുന്നു. കരുമാടി പാലത്തിന് തെക്കുഭാഗത്തായാണ് മൃതദേഹം കാണപ്പെട്ടത്. ഇൻക്വസ്റ്റ് തയാറാക്കി മൃതദേഹം ആലപ്പുഴ മെഡിക്കൽ കോളജ് ആശുപത്രിയിലേക്ക് മാറ്റി. അമ്പലപ്പുഴ പൊലീസ് മേൽനടപടി സ്വീകരിച്ചു.
