ആലപ്പുഴ: വഴിച്ചേരി-ആശ്രമം റോഡ് മന്നത്ത് ജങ്ഷനിൽ കാറിടിച്ച് ടിപ്പറിനടിയിൽപെട്ട ബുള്ളറ്റ് യാത്രികനായ യുവാവിന് ദാരുണാന്ത്യം. പൂന്തോപ്പ് ആർ.എസ് നിവാസിൽ റൂബൻ രാജാണ് (34) മരിച്ചത്. ശനിയാഴ്ച വൈകീട്ട് 4.50നായിരുന്നു അപകടം. കാർ തട്ടി ടിപ്പറിനടിയിലേക്ക് വീണ റൂബൻരാജിനെ നാട്ടുകാർ ഓട്ടോറിക്ഷയിൽ ആശുപത്രിയിൽ എത്തിക്കാന്‍ ശ്രമിച്ചെങ്കിലും സാധിച്ചില്ല. പിന്നീട് അഗ്നിരക്ഷാസേന എത്തി ജനറൽ ആശുപത്രിയിൽ എത്തിച്ചെങ്കിലും മരിച്ചു. ആശ്രമത്തിനടുത്ത് വാടകക്ക് താമസിക്കുന്ന റൂബൻ രാജ്, കുടുംബവീട്ടിൽ മാതാവിനെ എഴുന്നള്ളിക്കുന്ന ചടങ്ങുമായി ബന്ധപ്പെട്ട് വെള്ളിയാഴ്ച ഭാര്യക്കും കുട്ടിക്കുമൊപ്പം അവിടെയായിരുന്നു. വൈകീട്ട് ചടങ്ങിൽ പങ്കെടുക്കാൻ വസ്ത്രം മാറുന്നതിന് ഇപ്പോൾ താമസിക്കുന്ന വീട്ടിലേക്ക് പോകുമ്പോഴാണ് അപകടമുണ്ടായത്. മൃതദേഹം ആലപ്പുഴ മെഡിക്കൽ കോളജ് ആശുപത്രി മോര്‍ച്ചറിയില്‍. ഇടിച്ച കാര്‍ നിര്‍ത്താതെ പോയി. സി.സി.ടി.വി പരിശോധിച്ച് പൊലീസ് വാഹനത്തിനായുള്ള തിരച്ചില്‍ തുടങ്ങി. മാതാവ്: മംഗളം. ഭാര്യ: മോനിഷ. മകൾ: ഇവാന.
