മൂവാറ്റുപുഴ: കാറും കെ.എസ്.ആർ.ടി.സി ബസും കൂട്ടിയിടിച്ച് യുവാവ് മരിച്ചു. കദളിക്കാട് കളരിക്കത്തൊട്ടിയിൽ സുജേഷിന്‍റെ മകൻ അലനാണ് (24) മരിച്ചത്. കദളിക്കാട് മണിയന്തടം കവലക്ക് സമീപം ഞായറാഴ്ച രാത്രി 11.30ഓടെയാണ് അപകടം. തൊടുപുഴ ഭാഗത്തുനിന്ന് കദളിക്കാട്ടേക്ക് വരുകയായിരുന്ന അലൻ സഞ്ചരിച്ച കാറും എതിർദിശയിൽ വന്ന കെ.എസ്.ആർ.ടി.സി ബസും കൂട്ടിയിടിക്കുകയായിരുന്നു.
കാർ പൂർണമായും തകർന്നു. അലൻ റോഡിലേക്ക് തെറിച്ചുവീഴുകയും ചെയ്തു. സമീപവാസികൾ ചേർന്ന് തൊടുപുഴ ആശുപത്രിയിലെത്തിച്ചെങ്കിലും മരിച്ചു. വാഴക്കുളത്ത് നക്ഷത്ര ജ്വല്ലറി എന്ന സ്ഥാപനം നടത്തുകയാണ് അലന്‍റെ പിതാവ് സുജേഷ്. മാതാവ്: ജസി. ഇവരുടെ ഏക മകനാണ് അലൻ.
