കൊടുമൺ: കുടുംബവഴക്കിനെത്തുടർന്ന് പെട്രോളൊഴിച്ച് തീ കൊളുത്തി ആത്മഹത്യക്ക് ശ്രമിച്ചയാൾ മരിച്ചു. കൊടുമൺ കിഴക്ക് പാലവിളയിൽ ജോസാണ് (62) ശനിയാഴ്ച രാവിലെ കോട്ടയം മെഡിക്കൽ കോളജ് ആശുപത്രിയിൽ മരിച്ചത്. രക്ഷിക്കാൻ ശ്രമിച്ച ഭാര്യ ഓമന (55) ഗുരുതര പൊള്ളലേറ്റ് മെഡിക്കൽ കോളജ് ആശുപത്രിയിൽ ചികിത്സയിലാണ്. വെള്ളിയാഴ്ച വൈകീട്ട് 4.30ന് വീട്ടിൽ വെച്ചാണ് സംഭവം. വീടിന്റെ പിറകുവശത്ത് അടുക്കളഭാഗത്തുവെച്ച് ജോസ് ദേഹത്ത് പെട്രോൾ ഒഴിച്ച് തീകൊളുത്തുകയായിരുന്നു. ജോസിനെ രക്ഷിക്കാൻ ഭാര്യ ഓമന ശ്രമിക്കുമ്പോഴാണ് അവർക്കും പൊള്ളലേറ്റത്. ഗുരുതര പൊള്ളലേറ്റ ഇരുവരെയും ആദ്യം പത്തനംതിട്ട ജനറൽ ആശുപത്രിയിലും തുടർന്ന് കോട്ടയം മെഡിക്കൽ കോളജ് ആശുപത്രിയിലും പ്രവേശിപ്പിക്കുകയായിരുന്നു. മക്കൾ: ജിത്തു, ജോബി.