അങ്കമാലി: സ്കൂൾ ഗ്രൗണ്ടിൽ കായികപരിശീലനത്തിനിടെ വിദ്യാർഥി കുഴഞ്ഞുവീണ് മരിച്ചു. ഡി. പോൾ ഇംഗ്ലീഷ് മീഡിയം സ്കൂളിലെ എട്ടാം ക്ലാസ് വിദ്യാർഥി നെടുമ്പാശ്ശേരി മേക്കാട് തുരുത്തിശ്ശേരി തണ്ണാൻകുഴിയിൽ വീട്ടിൽ സിജി വർഗീസിന്‍റെ (അധ്യാപകൻ, ഹോളിഗ്രേസ് അക്കാദമി, മാള) മകൻ സാമുവൽ സിജിയാണ് (13) മരിച്ചത്. വ്യാഴാഴ്ച വൈകീട്ട് മൂന്നിന് സ്കൂൾ ഗ്രൗണ്ടിൽ നടന്ന കബഡി പരിശീലനത്തിനിടെയാണ് സാമുവൽ കുഴഞ്ഞുവീണത്. ഉടൻ അങ്കമാലി രാജഗിരി ആശുപത്രിയിലെത്തിച്ചെങ്കിലും മരിച്ചു. മൃതദേഹം എറണാകുളം മെഡിക്കൽ കോളജ് ആശുപത്രിയിലേക്ക് മാറ്റി. മാതാവ്: പറവൂർ കൊേങ്ങാർപ്പിള്ളി മുള്ളൂർ കുടുംബാംഗം രേഖ (ടെൽക്, അങ്കമാലി). സഹോദരി: സൂസൺ സിജി (പ്ലസ് വൺ വിദ്യാർഥിനി, ഗവ. ഹയർ സെക്കൻഡറി സ്കൂൾ, ചെങ്ങമനാട്). സംസ്കാരം വെള്ളിയാഴ്ച കരിമുകൾ ചെറുത്തോട്ടുകുന്നേൽ സെന്‍റ് ജോർജ് യാക്കോബായ പള്ളി സെമിത്തേരിയിൽ.
