ആലത്തൂർ: ഹംപ് ചാടുന്നതിടെ സ്വകാര്യ ബസിന്‍റെ വാതിലിലൂടെ വീണ യാത്രക്കാരൻ മരിച്ചു. എരിമയൂർ ചുള്ളിമട തേക്കാനത്ത് വീട്ടിൽ ടി.പി. ജോൺസനാണ് (54) മരിച്ചത്. വെള്ളിയാഴ്ച രാവിലെ 8.45ന് ദേശീയപാത സർവിസ് റോഡിൽ എരിമയൂർ ഗവ. എച്ച്.എസ്.എസിന് സമീപത്തായിരുന്നു അപകടം. കണ്ണനൂരിൽ സ്വകാര്യ സ്റ്റീൽ ഫർണിച്ചർ സ്ഥാപനത്തിലെ ജോലിക്ക് പോകുകയായിരുന്നു. എരിമയൂർ ബസ് സ്‌റ്റോപ്പിൽനിന്ന് 200 മീറ്റർ അകലെയുള്ള ഹംപ് ചാടുന്നതിനിടെ പിന്നിലെ ചവിട്ടുപടിക്ക് സമീപം നിന്നിരുന്ന ജോൺസൺ റോഡിലേക്ക് തെറിച്ചുവീഴുകയായിരുന്നു. തൃശൂർ മെഡിക്കൽ കോളജ് ആശുപത്രിയിലെത്തിച്ചെങ്കിലും ഉച്ചയോടെ മരിച്ചു. പിതാവ് പരേതനായ പൗലോസ്. മാതാവ്: മേരി. ഭാര്യ: മിനി. മക്കൾ: ജോസ്മി, ജോമോൾ, ജോസ്‌ന. മരുമകൻ: വിപിൻ ഇരുമ്പകച്ചോല (ഗൾഫ്).സഹോദരങ്ങൾ: മേരി, ഷൈജ, പരേതനായ വർഗീസ്. മൃതദേഹം തൃശൂർ മെഡിക്കൽ കോളജ് ആശുപത്രി മോർച്ചറിയിൽ. പോസ്റ്റ്മോർട്ടത്തിനുശേഷം ശനിയാഴ്ച ഉച്ചക്ക് രണ്ടിന് ആലത്തൂർ ലിറ്റിൽ ഫ്ലവർ പള്ളി സെമിത്തേരിയിൽ സംസ്കരിക്കും.
