മാനന്തവാടി: മാനന്തവാടി രൂപതാംഗം ഫാ. ജോസഫ് നന്തിക്കാട്ട് (81) നിര്യാതനായി. ദ്വാരക വിയാനി ഭവനിൽ വിശ്രമജീവിതത്തിലായിരുന്നു. പാലാ രൂപത പൈക ഇടവകയിലെ നന്ദിക്കാട്ടുകണ്ടത്തിൽ വർഗീസിന്റെയും ത്രേസ്യയുടെയും മകനാണ്. പാലാ മൈനർ സെമിനാരിയിലും ആലുവ മംഗലപ്പുഴ കാർമൽഗിരി സെന്റ് ജോസഫ്‌സ് പൊന്തിഫിക്കൽ സെമിനാരിയിലും വൈദികപഠനം പൂർത്തിയാക്കി. 1967 ഡിസംബർ 19ന് വൈദികപട്ടം സ്വീകരിച്ചു. പുല്ലൂരാംപാറ ഇടവകയിൽ അസി. വികാരിയായും വിളക്കന്നൂർ, കയ്യൂന്നി, കൊട്ടിയൂർ, കാരയ്ക്കാമല, ഒണ്ടയങ്ങാടി, പാറത്തോട്ടം, ചേലൂർ, കാവുംമന്ദം ഇടവകകളിൽ വികാരിയായും ബോയ്‌സ് ടൗൺ, സെമിനാരിവില്ല സ്ഥാപനങ്ങളുടെ ഡയറക്ടറായും പ്രവർത്തിച്ചു. തിങ്കളാഴ്ച രാവിലെ 10ന് ദ്വാരക പാസ്റ്ററൽ സെന്ററിൽ മാനന്തവാടി രൂപതാധ്യക്ഷൻ മാർ ജോസ് പൊരുന്നേടത്തിന്റെ നേതൃത്വത്തിൽ സംസ്കാര ശുശ്രൂഷകൾ തുടങ്ങും. തുടർന്ന് ദ്വാരകയിലെ വൈദിക സെമിത്തേരിയിൽ സംസ്കരിക്കും.
