ഉദുമ: കാഞ്ഞങ്ങാട്- കാസര്‍കോട് കെ.എസ്.ടി.പി റോഡില്‍ മേല്‍പറമ്പ് കട്ടക്കാലില്‍ മീന്‍ലോറിയും ബേക്കറി സാധനങ്ങള്‍ കൊണ്ടുപോവുകയായിരുന്ന മിനിലോറിയും കൂട്ടിയിടിച്ച് മലപ്പുറം സ്വദേശിയായ യുവാവ് മരിച്ചു. സഹഡ്രൈവറായ സുഹൃത്തിനും മീന്‍ ലോറിയിലുണ്ടായിരുന്ന രണ്ടുപേര്‍ക്കും പരിക്കേറ്റു. വെള്ളിയാഴ്ച രാവിലെ ആറരയോടെയായിരുന്നു അപകടം. മലപ്പുറം പള്ളിക്കൽ വില്ലേജിലെ കരുവാൻകല്ല് താന്നിക്കോട്ടുമ്മല്‍ ഹൗസില്‍ ടി.കെ. ഷബീറലിയാണ് (35) മരിച്ചത്. മിനിലോറി ഓടിച്ച സുഹൃത്ത് ആസിഫലിയെ പരിക്കുകളോടെ കാസര്‍കോട് ജനറല്‍ ആശുപത്രിയില്‍ പ്രവേശിപ്പിച്ചു. മീന്‍ലോറിയിലെ ജീവനക്കാരുടെ പരിക്ക് ഗുരുതരമാണ്. ഇവരെ മംഗളൂരുവിലെ ആശുപത്രിയില്‍ പ്രവേശിപ്പിച്ചു. വാഹനങ്ങളുടെ മുന്‍ഭാഗം വെട്ടിപ്പൊളിച്ചാണ് അകത്ത് കുടുങ്ങിയവരെ പുറത്തെടുത്തത്. കരുവൻകല്ല് ബി.ബി.സി ബേക്കറി ഉടമയാണ് ഷബീറലി. ഭാര്യ: മാജിത ഫർസാന. മക്കൾ: റൈഹാൻ, റസാൻ, കദീജ അൻസ.
