കൽപറ്റ: കൽപറ്റയിൽ സ്കൂട്ടറിടിച്ച് കാൽനടയാത്രക്കാരൻ മരിച്ചു. ഓണിവയൽ പുഷ്പിത വീട്ടിൽ സുന്ദരന്‍റെയും പരേതയായ പുഷ്പയുടെയും മകൻ ജിജി മോൻ (പാപ്പൻ-43) ആണ് മരിച്ചത്. തിങ്കളാഴ്ച രാത്രി 11.30 ഓടെ കൽപറ്റ ബൈപാസ് റോഡിൽ ജനമൈത്രി ജങ്ഷന് സമീപത്താണ് അപകടം. ജിജിമോനെ ഇടിച്ചശേഷം വാഹനം നിർത്താതെ പോവുകയായിരുന്നു. തലക്ക് ഗുരുതരമായി പരിക്കേറ്റ ജിജിമോൻ സംഭവസ്ഥലത്തുവെച്ചു തന്നെ മരിച്ചു. ഏതുവാഹനമാണ് ഇടിച്ചതെന്ന് ആദ്യം വിവരം ലഭിച്ചിരുന്നില്ല. പരിക്കേറ്റ സ്കൂട്ടർ യാത്രക്കാരൻ ആശുപത്രിയിൽ ചികിത്സ തേടിയിരുന്നു. തുടർന്ന് പൊലീസും ഫോറൻസിക് വിദഗ്ധരും നടത്തിയ പരിശോധനയിലാണ് സ്കൂട്ടറിടിച്ചാണ് ജിജിമോൻ മരിച്ചതെന്ന് വ്യക്തമായത്. സ്കൂട്ടർ യാത്രക്കാരനായ പാലക്കാട് സ്വദേശിയും കൽപറ്റയിലെ താമസക്കാരനുമായ അജീഷിനെ കൽപറ്റ പൊലീസ് അറസ്റ്റ് ചെയ്തു. ഇയാൾ മദ്യലഹരിയിലായിരുന്നുവെന്നും പൊലീസ് പറഞ്ഞു. ഭാര്യ: മീന. മക്കൾ: ജിതിൻ കൃഷ്ണ, ദേവിക. സഹോദരങ്ങൾ: നിർമൽ, റെജീഷ്, വിജയ്.
