ഇരിട്ടി: വട്ട്യംതോട്-മാട്ടറ റോഡിൽ കടമനക്കണ്ടി വളവിൽ വിദ്യാർഥികളെയും കയറ്റി സ്‌കൂളിലേക്ക് പോവുകയായിരുന്ന ഐറിസ് ഓട്ടോറിക്ഷയും സ്വകാര്യ ബസിടിച്ചുണ്ടായ അപകടത്തിൽ ഓട്ടോ ഡ്രൈവർ മരിച്ചു. ആറ് വിദ്യാർഥികൾക്ക് പരിക്കേറ്റു. മാട്ടറ സ്വദേശി പുൽപറയിൽ തോമസ് വർഗീസാണ് (49) മരിച്ചത്. ഓട്ടോയിൽ സഞ്ചരിച്ച മണിക്കടവ് സെന്റ് തോമസ് ഹയർസെക്കൻഡറി സ്‌കൂളിലെ ആറു കുട്ടികൾക്കും ബസിൽ സഞ്ചരിച്ച മാട്ടറ കാരീസ് യു.പി സ്‌കൂളിലെ അഞ്ച് കുട്ടികൾക്കുമാണ് പരിക്കേറ്റത്. പരിക്കേറ്റ കുട്ടികളെ ഇരിട്ടിയിലെയും കണ്ണൂരിലെയും ആശുപത്രികളിൽ പ്രവേശിപ്പിച്ചു. വ്യാഴാഴ്ച രാവിലെ ഒമ്പതോടെയായിരുന്നു അപകടം. മാട്ടറയിൽനിന്ന് വിദ്യാർഥികളുമായി മണിക്കടവ് സ്‌കൂളിലേക്ക് പോവുകയായിരുന്ന ഓട്ടോറിക്ഷയാണ് അപകടത്തിൽപെട്ടത്. മിനിയാണ് മരിച്ച തോമസിന്റെ ഭാര്യ. മക്കൾ: ആൽബിൻ, അലീന. സംസ്കാരം വെള്ളിയാഴ്ച രാവിലെ 9.30ന് മാട്ടറ സെന്റ് മേരീസ് പള്ളി സെമിത്തേരിയിൽ.
